Мына MP3-Player-дің айнымас досыма айналғанына да 5 жылдың жүзі боп қалыпты. Универге, жұмысқа барар жолда, қоғамдық көлікте, тағы да бір жерге жүріп баратын болсам, осы плеерді тыңдауды әдетке айналдырып алдым. Біраз аудио-кітап, дәрістер тыңдап, дүниетанымымды кеңейттім, діни уағыздар тыңдап, рухани байи түстім. Ағылшын тілін меңгеру барысында listening-імді (тыңдау) жақсартуға біраз септігін тигізді. Жалпы уақытымды барынша пайдалы өткізуіме бұл плеер зор көмек болды. Жақында кішігірім есептеу жүргізіп көрдім. Бір жерге барып келуге (әдетте бұл қазір жұмыс, бұрын универ болатын) күн сайын шамамен 1 сағат уақытым кетеді екен. Аптада 5 жұмыс күні бар екенін ескерсек, бір айда (22 жұмыс күні) жай жолға кететін уақытта орташа 22 сағат пайдалы мағлұмат алуға болады екен. Демалыс күндерін алып тастағанда, бір жылда шамамен 200 күндей жұмысқа/универге барамыз. Күніне 1 сағат пайдалы аудио-дәріс тыңдауға болатынын қаперімізге алсақ, сонда бір жылда барлығы 200 сағат (!) шығады екен! Осыдан кейін қосымша білім алуға уақытым жоқ деп айтып көріңізші :)
Кейбір замандастарым белгілі бір себептермен өз уақытында білім ала алмай, қазір күзетші немесе таксист боп нәпақасын тауып жүр. Меніңше, олар уақыттарын дұрыс қолданып жатқан жоқ. Таксист құрдасымның көлігінде мағынасы жоқ музыканы ойнатып қойғанын көргенде, «қаншама жол жүреді, осы уақытта бір аудио-кітапты қосып қойса, біраз білімін арттыруға болар еді ғой» деп жаным ашиды.
Өткенде күзетте тұрған бір жас жігітті көрдім. Қалтафонын құлағына тосып, біреумен қызу сөйлесіп жатыр екен. Жайлы отырысына қарағанда, біраз әңгіменің басын шалып жатқан сияқты көрінді. Әңгімесінің ғылым-білім төңірегінде емес екені белгілі. Сол уақытта бос әңгіме айтқанша, қолына кітап ап оқыса немесе өміріне қажет аудио-сабақ, бір коучтың жеке даму жайлы лекциясын тыңдаса, әлдеқайда пайдалырақ болар еді ғой деп ойладым.
Есептеп қараса, ол жігіт жай тұрғанша, өз ауысымының (әдетте ол 1 тәулік) 6 сағатын белгілі бір саладағы аудио-кітапты тыңдауға арнаса, бір жылда беделді университетте екі семестр бойы оқытылатын материалға пара-пар білімді меңгеріп ала алады екен. Осыдан кейін біреуге налудың, уақыттың жоқтығын айтудың еш қисыны жоқ деп ойлаймын.
Әркімнің материалдық жағдайы, әлеуметтік статусы әр түрлі болғанымен, бәріне бірдей уақыт берілген. Күн сайын барлық адамның иелігіне 24 сағат беріледі. Оны әркім әрқалай пайдалануда. Уақыт – ең бағалы ресурс. Ақшаны қайтара алғаныңмен, уақытты қайтара алмайсың. Уақытын бағалай білгендер әрдайым алдыңғы шептен табылады, көп нәрсеге үлгереді әрі артында көп іс қалдырып кетеді. Осындай бағалы ресурсымызды тиімді пайдалана білуде жаңа технологиялардың, оның ішінде осындай MP3-плеердің рөлі ерекше. Осы 5 жылда маған қосымша 1000 сағат сыйлап, оны пайдалы іске жұмсауыма көмектескен «досыма» алғысым көп әрі достығымыз ары қарай жалғаса түссе екен деген тілегім бар.

Данияр Жігітбек